Cynlluniwyd y ward newydd, sy’n darparu 18 o welyau, gan gynnwys 3 stafell sengl, i ddarparu amgylchedd tawel a llonydd i gleifion er mwyn eu helpu i wella.
Yn 2005, cyhoeddodd Comisiwn Iechyd Cymru’r Adolygiad Strategol o Wasanaethau Niwrowyddorau ar gyfer Cymru. Tynnodd yr Adolygiad sylw at bryderon ynghylch cynaliadwyedd dwy ganolfan niwrofeddygol yn y De, un yng Nghaerdydd a’r llall yn Abertawe.
Mewn ymateb i hyn gofynnodd y Gweinidog Iechyd ar y pryd, Edwina Hart, i Grŵp Adolygu Annibynnol o dan arweiniad James Steers wneud gwaith pellach a nodi cyfeiriad Niwrowyddorau yn y dyfodol.
Cydnabu adroddiad Grŵp Adolygu Arbenigol Allanol Niwrowyddorau Cymru – Argymhellion ar gyfer y Canolbarth a’r De (Adroddiad Steers) fod safon gofal da’n cael ei ddarparu, ond bod lle i wella ac y dylai fod un gwasanaeth niwrofeddygol ar gyfer y De a’r Gorllewin.
Gwnaeth yr adroddiad nifer o argymhellion, gan gynnwys cryfhau ac ehangu capasiti llawdriniaethau’r asgwrn cefn sydd heb fod yn rhy gymhleth yn Ysbyty Treforys er mwyn darparu mynediad gwell yn lleol i gleifion y Canolbarth a’r Gorllewin.
Roedd hefyd yn argymell y dylid cyd-leoli llawdriniaethau cymhleth i’r asgwrn cefn a niwrofeddygaeth yr ymennydd o fewn uned fwy ar y safle yng Nghaerdydd.
Yn dilyn yr argymhellion hyn, daethpwyd o hyd i gyllid cyfalaf a fyddai’n adeiladu dwy theatr yn ogystal â llety atodol a datblygiad llety ar gyfer dwy ward, ac yn y wardiau byddai tair stafell â phedwar gwely ynddynt gydag en-suite; deg stafell sengl gydag en-suite, stafell dawel, desg/man gwaith i staff a storfa ar gyfer cyfarpar/llieiniau, gan wneud cyfanswm o 55 o welyau.
Gydag agor y ward newydd hon, mae’r holl wasanaethau niwrofeddygol a niwroleg i gleifion mewnol a chleifion dydd yn yr un lleoliad, ac yn agos i’r theatr a’r cyfleusterau gofal critigol; i greu gwelyau gofal critigol ychwanegol.
Hefyd darperir swyddfeydd newydd ar gyfer trosglwyddo Niwrolawfeddygon ymgynghorol o Ysbyty Treforys a chyfleusterau addysgu yn agos i’r theatrau niwrofeddygaeth penodedig, â chysylltiadau TG rhwng y stafell seminar a’r theatrau.
Ariannwyd yr holl ddatblygiadau o Raglen Cyfalaf Iechyd a Gwasanaethau Cymdeithasol Cymru Gyfan. Cyfanswm y gost oedd £18,056 miliwn.
Dywedodd y Gweinidog Iechyd Lesley Griffiths:
“Mae’n ward hon yn ben llanw i waith caled a chynllunio gofalus a bydd yn adnodd gwerthfawr ar gyfer trin anafiadau i’r pen a’r gwddf, yn ogystal â gwneud ymchwil barhaol i’r Niwrowyddorau.”
Dywedodd Andrea Richards, Rheolwr y Gyfarwyddiaeth ar gyfer Niwrowyddorau gyda Bwrdd Iechyd Prifysgol Caerdydd a’r Fro:
“Mae’r cyfleusterau newydd a’r staff ychwanegol yn golygu y gallwn ddarparu gofal arbenigol rhagorol mewn amgylchedd a luniwyd at ein hanghenion penodol ni. Mae hefyd yn golygu y gallwn wella’r rheolaeth o heintiau, y gallwn sicrhau urddas a phreifatrwydd i gleifion a’n bod yn gallu darparu llety un rhyw.“Mae’r buddsoddiad wedi gwneud gwahaniaeth go iawn i’r gwasanaeth rydym yn ei ddarparu yma i bobl â chyflyrau difrifol iawn ledled Cymru.”
